Thmey Thmey 25
ក្រៅពី​តំបន់ឆ្នេរ ខេត្ត​ព្រះសីហនុ មាន​កោះ​សក្ដានុពល​ទេសចរណ៍​ចំនួន​៣២
10/06/2020 5:00 pm ព្រះសីហនុ ​ភ្នំពេញ​៖ ខេត្ត​ព្រះសីហនុ មាន​ឆ្នេរសមុទ្រ​ដែលមាន​ខ្សាច់​សក្បុស និង​ត្រូវបាន​ភ្ញៀវទេសចរ​ស្គាល់ ជា​យូរ​យារ​មកហើយ​។ ក្រៅពី​តំបន់ឆ្នេរ  ខេត្ត​នេះ ក៏មាន​កោះ​តូច​-​ធំ ដែល​ពោរពេញ​ដោយ​សក្តានុពល​ទេសចរណ៍​ចំនួន​៣២ និង​មាន​ផ្ទៃក្រឡា​ជាង​១៦២ គីឡូម៉ែត្រ មាន​ឆ្នេរសមុទ្រ​ប្រវែង ១៧៥,៨ គីឡូម៉ែត្រ​។ នេះ​បើតាម​លោក គួច ចំរើន អភិបាលខេត្ត​ព្រះសីហនុ ដែល​បាន​ថ្លែង​នៅក្នុង​សន្និសីទ​សារព័ត៌មាន​ពី​វឌ្ឍនភាព និង​ទិសដៅ​ការងារ​បន្ត​របស់​ខេត្ត​ភាគ​និរតី​មួយ​នេះ​កាលពី​ថ្ងៃទី​៩ ខែមិថុនា​។​

​បណ្តា​តំបន់​ទេសចរណ៍​តាម​ឆ្នេរ និង​កោះ​ដែលមាន​អំណោយផល​ពី​ធម្មជាតិ​ទាំងនោះ​រួមមាន ឆ្នេរ​អូរ​ឈើទាល ឆ្នេរ​ឯករាជ្យ ឆ្នេរ​សុខា​កោះរ៉ុង កោះរ៉ុង​សន្លឹម កោះ​សង្សារ និង​កោះពស់​ជាដើម​។ ដ្បិត​មាន​សក្ដានុពល​ពី​ធម្មជាតិ ការអភិវឌ្ឍ​ហេដ្ឋារចនាសម្ព័ន្ធ ផ្លូវ​ល្បឿន​លឿន​ពី​ភ្នំពេញ​-​ក្រុងព្រះសីហនុ និង​ការស្ថាបនា​ផ្លូវ​ចំនួន​៣២​ខ្សែ​ក្នុង​ខេត្ត​នេះ ក៏​រួមចំណែក​យ៉ាង​ធំធេង ក្នុងការ​ទាក់​ទាញ​ទេសចរ និង​វិនិយោគិន​បន្ថែមទៀត​ដែរ​។ នេះ​បើតាម​ការបញ្ជាក់​របស់​លោក គួច ចំរើន។

​យ៉ាងណាក៏ដោយ នៅ​តំបន់​កោះ​មួយចំនួន នៅ​មិនទាន់មាន​ការផ្គត់ផ្គង់​ទឹកស្អាត និង​អគ្គិសនី​គ្រប់គ្រាន់​នៅឡើយ​ទេ ដោយសារតែ​វា​មាន​ចម្ងាយ​ឆ្ងាយ​ពី​ទីប្រជុំជន ដែល​តម្រូវ​ឲ្យ​ការវិនិយោគ​ខ្ពស់​៕


ដោយ៖ ខន ណារី © រក្សាសិទ្ធិដោយ thmeythmey25.com