«កោះសាមសិប» សហគមន៍អេកូទេសចរណ៍ថ្មី លាក់សម្រស់តាមដងទន្លេមេគង្គ ខេត្តក្រចេះ| Thmey Thmey 25

«កោះសាមសិប» សហគមន៍អេកូទេសចរណ៍ថ្មី លាក់សម្រស់តាមដងទន្លេមេគង្គ ខេត្តក្រចេះ

11/06/2020 10:05 am ក្រចេះ៖ «កោះសាមសិប» ជាតំបន់អេកូទេសចរណ៍ថ្មីមួយ លាតសន្ធឹងតាមដងទន្លេមេគង្គ ជាប់ព្រំប្រទល់ខេត្តក្រចេះ និងស្ទឹងត្រែង។ កោះនេះ ស្ថិតក្នុងកម្រងកោះមួយ នៅក្នុងចំណោម កោះទាំងអស់ ដែលស្ថិតនៅក្នុងភូមិចំនួនបី គឺខ្សាច់លាវ កោះខ្ញែរ និងពន្ធជា នៃឃុំអូរគ្រៀង ស្រុកសំបូរ ខេត្តក្រចេះ។

បង្កើតឡើងនៅឆ្នាំ២០១៨ ដោយមានការគាំទ្រដោយអង្គការ NTFP-EP Cambodia និងអង្គការ WWF «កោះសាមសិប» ជាតំបន់ប្រជុំទៅដោយកោះតូចធំជាច្រើនដែលគ្របដណ្ដប់ដោយព្រៃឈើតូចធំ និងជាបណ្ដុំសរសៃទឹក និងជីវចម្រុះនៃដងទន្លេមេគង្គ។

ដើម្បីធ្វើដំណើរមកដល់កោះសាមសិប ភ្ញៀវទេសចរជាតិ-អន្តរជាតិ ត្រូវជិះទូកសហគមន៍ រយៈពេលជាង១ម៉ោង តាមដងទន្លេមេគង្គ។ នៅទីនេះអ្នកទេសចរ អាចជិះទូកមើលសម្រស់ព្រៃលិចទឹក មើលថ្ងៃលិច និងថ្ងៃរះ, ថតរូបសត្វស្លាបដែលជិតផុតពូជ, គយគន់ព្រៃលិចទឹក,និងបោះតង់សម្រាកនៅលើឆ្នេរខ្សាច់សក្បុស។ ប៉ុន្តែ គេអាចទៅទស្សនាកោះនេះបានតែរដូវទឹកស្រកប៉ុណ្ណោះ ព្រោះជាពេលឆ្នេរខ្សាច់ដ៏ស្រស់ស្អាតបានរំលេចខ្លួនឡើង ហើយអាចមើលឃើញព្រៃលិចទឹក ដែលជាជម្រកត្រីមេពូជកម្រជាច្រើនប្រភេទ និងជាជម្រកដ៏សំខាន់សម្រាប់សត្វស្លាបប្រមាណ២១៨ប្រភេទ រួមមានសត្វស្លាបដែលកម្រជិតផុតពូជផងដែរ៕

ព័ត៌មានពេញនិយម